“Ўзбекистон Республикасида меҳнат шартномаси (контракт)” (Биринчи ва иккинчи китоблар) нашри меҳнат муносабатларини тартибга солишда муҳим аҳамиятга эга бўлган меҳнат шартномаларининг ҳуқуқий асослари, уларни тузиш, ўзгартириш ва бекор қилиш тартибларини атрофлича ёритишга бағишланган. Биринчи китобда меҳнат шартномасини тузиш масалалари, яъни ишга қабул қилиш тартиби, шартнома мазмуни, томонларнинг ҳуқуқ ва мажбуриятлари, иш берувчи ва ходим ўртасидаги келишув шартлари, шунингдек, меҳнат қонунчилиги талаблари асосида шартнома расмийлаштириш жараёнлари кенг ёритилган. Иккинчи китобда эса меҳнат шартномасини ўзгартириш ва бекор қилиш масалаларига алоҳида эътибор қаратилган. Унда меҳнат шартларини ўзгартириш асослари, томонлар келишуви ва бир томонлама ўзгартириш ҳолатлари, шунингдек, меҳнат шартномасини тугатиш сабаблари, тартиби ва ҳуқуқий оқибатлари таҳлил қилинган. Асарда амалий мисоллар, ҳуқуқий шарҳлар ва қонун нормаларини қўллаш бўйича тавсиялар ҳам келтирилган бўлиб, у ҳуқуқшунослар, кадрлар бўлими мутахассислари, раҳбарлар ва кенг китобхонлар оммаси учун фойдали манба ҳисобланади.