Қўлингиздаги китоб тафаккур эркинлиги масаласига бағишланган. Унда эркинликнинг ўзи нима, тафаккур эркинлиги-чи, унга қандай эришилади, деган саволларга жавоб изланади. Тафаккурнинг тарихий шакллари ва тадрижи, тафаккурга таъсир кўрсатувчи омиллар ҳақида сўз юритилади. Ҳозирги ахборот-коммуникация технологияларининг сиёсий ва мафкуравий мақсадларни кўзлаб ижтимоий онгни, бутун одамзод тафаккурини бошкаришда кенг қўлланаётгани, сунъий интеллект ва автоматлаштиришнинг тафаккурга зиддиятли таъсири масалалари ҳам муаллиф эътиборидан четда қолган эмас. Рисолада тафаккур эркинлиги муаммоси юртимизда Учинчи Ренессанс пойдеворини яратиш, «Миллий тикланишдан - миллий юксалиш сари» ғоясини амалга ошириш ҳамда таълим-тарбия масалалари билан боғлаб тадқиқ этилган. Муаллиф ўз фикрларини далиллаш баробарида кизикарли ва мантикий мисолларни келтиради. Китоб олий ўқув юрти талабалари, илмий изланувчилар. ўқитувчилар, тафаккур, онг масалалари билан қизикувчи кенг китобхонларга мўлжалланган.