Мазкур ўқув қўлланманинг биринчи китобида XVII— XX аср бошларигача бўлган санъат, иккинчи китобида эса XX аср санъати тарихи ҳақида мулоҳаза юритилади. Ҳар икки китоб ўзаро узвий боғлиқ бўлганлиги туфайли, изоҳ ва адабиётлар рўйхати иккинчи китоб охирига кўчирилган. Расмлар рўйхати, рассом, ҳайкалтарош ва меъморлар, халқ усталари ҳақидаги маълумотлар эса ҳар китобнинг ўзида берилган. Китобда жаҳон санъати ривожининг энг муҳим босқичлари, улардаги услублар, йирик ижодкорлар ва уларнинг етук асарлари ҳақида мулоҳаза юритилган. Ҳар бир даврнинг ўзига хос эстетик қарашларини ёритишда бугунги кун санъатшунослиги нуқтаи назаридан ёндашишга ҳаракат қилинган.