Tog'ay Murodni shaxsan tanish, hamsuhbat bo'lish nasib etmagan, lekin uni yozuvchi sifatida taniganimga ancha bo'ldi. Yozuvchining "Oydinda yurgan odamlar" qissasini o'qiganimda ismsiz bir taassurot ichida qolganimni eslayman: maza qilib o'qiganim rost-u, birovga aytib bergudek voqeasi yo'qdek edi-da!.. Qahramonlari ham binoyidek-u, insho yozganingda "falonchiga o'xshagim keladi", deydigan emas-da!.. Bu yanglig' taassurotning sababini keyinroq angladim: adabiyotimiz yangilanayotgan payt ekan, Tog'ay Murod shu yangilanishni boshlaganlardan biri - bizning adabiyot haqidagi tasavvurlarimizni yangilagan avlodning ilg'orida bor- gan vakillaridan ekan...