Жаҳон тарихидаги буюк сиймолардан бири, Марказий Осиё халқларининг иқтисодий, сиёсий ва маънавий тараққиётига улкан ҳисса қўшган давлат арбоби ва саркарда, фан ва маданият ҳомийси Амир Темурнинг ҳаёти ва жўшқин фаолияти , мўғуллар истилоси асоратидан Ватанни озод этиб, марказлашган қудратли давлатни тиклаши, ҳарбий юришлари ва ниҳоят, бу фавқулодда истеъдодли инсон шахсиятидаги зиддиятлар тафсилоти ҳаммани қизиқтиради. Бу борада ҳали Амир Темур ҳаётлигидаёқ воқеалар шоҳидлари томонидан ёзилган асарлар тарихий манба сифатида муҳим аҳамиятга моликдир. Улардан бири Низомиддин Шомийнинг "Зафарнома" сидир. Шомий Темур ҳаётини пухта билган, унинг саркардалиги ва давлатчилик қобилияти, диний ва дунёвий фанларга муҳаббати ҳақида мустақил тушунчага эга бўлган. Шу сабабли у воқеаларни ҳаққоний ёритган ва Темур фаолиятига холисона баҳо беришга ҳаракат қилган.