Янги нашр муносабати билан ардоқли китобхонларга айтар сўзим: "Одамийлик мулки "нинг биринчи китоби 2005 йили айнан шу нашриётда чоп этилган эди. Шундан сўнг ахлоқ китобининг иккинчи ва учинчи фасллари ҳам ёзилганидан сиз азизлар хабардорсиз. Мазкур китоблар алоҳида тўплам ҳолида ҳам "Шарқ” нашриётида қайта-қайта нашр этилди-ки, мен у азизлардан бағоят миннатдорман. Йиллар давомида китобни ўқиган мухлислардан турли таклифлар ёзилган мактублар олдим, учрашувларда эшитдим. Ахлоқ китобини яна тўлдириш таклифи мени бу ишга ундади. "Одамийлик мулки" учун тўплаган, лекин ҳажмни қисқартириш мақсадида киритилмаган ҳикматлар билан китобхонларни таништириш истаги туғилган пайтда "Sano-standart"дан ҳам бу борада ҳамкорлик қилиш таклифини олдим. Кўп ойлик ҳаракатлардан сўнг қўлингиздаги уч китобдан иборат рисоланинг янги кўриниши вужудга келди. Янги нашрга янги боблар киритилди, суҳбатларнинг ўрни маъносига қараб ўзгартирилди, адабий тилга доир ғализликлар ва имло хатолар бартараф этилди. Энг муҳими аввалги нашрга "сиғмаган" ҳикматлар "Қўшимча дарс" сифатида илова қилинди. Яна айрим янгиликлар билан зийрак мухлисимиз асарни ўқиш жараёнида танишарлар