Umumiy amaliyot akusherlarini tayyorlashda tibbiyot kollejlarida akusherlik ilmining hozirgi kundagi yutuqlari, Jahon sog'liqni saqlash tashkiloti tavsiyalariga binoan tegishli ma'lumotlar asosida nazariy bilimlar berish va amaliy ko'nikmalar hosil qilish davr talabidir. Akusherlik ishi mutaxassislarini tayyorlashda hozirgi kunga qadar V.I.Bodyajinaning Akusherlik darsligi hamda xalqaro tashkilotlar tomonidan o'tkazilib kelinayotgan seminar o'quv qo'llanmalari, "Bexatar onalik" dasturi materiallari, O'zbekiston Respublikasi Sog'liqni saqlash vazirligining buyruqlari bilan tasdiqlangan yo'riqnomalardan tuzilgan ma'ruza matnlaridan foydalanilgan holda dars jarayoni tashkil etilib kelinmoqda. Shu nuqtai nazardan har tomonlama yetuk, malakali, amaliy ko'nikmalarga ega bo'lgan umumiy amaliyot akusherlarini tayyorlash uchun mo'ljallab yozilgan ushbu darslik tarmoq ta'lim standartlari talabidan kelib chiqib, 2007-yilda Oliy va o'rta maxsus ta'lim vazirligi tomonidan tasdiqlangan "Akusherlik" fani o'quv dasturi asosida tayyorlangan. Darslikda akusherlik fanining anatomiya, fiziologiya va patologiya asoslari, hamshiralik ishi, pediatriya, ichki kasalliklar, jarrohlik va reanimatsiya asoslari fanlari bilan bog'lab o'tiladigan mavzularga alohida o'rin berilgan