Lison ut-tayr’’ (“Qush tili”) dostoni Alisher Navoiy ijodida muhim o'rin tutuvchi asar hisoblanadi. Ushbu doston mazmuni kuylangan Farididdin Attorning “Mantiq ut-tayr" dostonini bola Alisher to'qqiz yoshida yod oldi va bir umr unga javob yozishni niyat qilib, oltmish yoshga qadam qo'yganidagina bu qutlug niyatni amalga oshirdi. Tasavvufning ramziy talqinidan iborat bo'lgan bu ajoyib doston qiziqarli mazmuni, qoliplovchi syujeti tarkibidagi ellikdan ortiq axloqiy-ta’limiy va ma’rifiy ruhdagi jozibali hikoyalari bilan kitobxonni o'ziga rom etadi.