Буюк шоир ва мутафаккир, атоқли давлат ва жамоат арбоби Алишер Навоийнинг бебаҳо ижодий-илмий мероси нафақат халқимиз, балки жаҳон адабиёти тарихида, миллий маданиятимиз ва адабий-эстетик тафаккуримиз ривожида алоҳида ўрин тутади. Улуғ шоир ўзининг шеърий ва насрий асарларида юксак умуминсоний ғояларни, она тилимизнинг беқиёс сўз бойлиги ва чексиз ифода имкониятларини бутун жозибаси ва латофати билан намоён этиб, ер юзидаги миллионлаб китобхонлар қалбидан муносиб ва мустаҳкам ўрин эгаллади. Мазкур кўп жилдлик китобнинг 27-жилдида Дилнавоз Юсупованинг "Алишер Навоий "Хамса"сида мазмун ва ритмнинг бадиий уйғунлиги" илмий асари, бир неча олимларнинг мақолалари ва Навоий ғазалларига шарҳлар киритилган.