Хоразмда ташкил топган Маъмун академияси Хоразм элининггина эмас, балки бутун Турон халқининг, қолаверса, умумбашариятнинг фахри ҳисобланади. Бу академия юртимизда IX — XII асрларда юз берган уйғонишнинг меваларидан бири эди. У бўш ва бўз заминда ўз —ўзидан пайдо бўлиб қолгани йўқ, албатта. Бу илм маркази "Авесто"дек буюк асарлар яратилган маконда асрий илмий муҳит ва фанний иқлим тараққий этган, марказлашган давлатга эга мамлакатда вужудга келган. Унинг ташкил топишида академияга аъзо бўлган олимлардан ташқари улардан бир —икки аср аввал фаолият кўрсатган алломаларнинг ҳам ҳиссаси қўшилган, десак, маъқул йўл тутган бўламиз.