"Strukturaviy geologiya va geologik xaritalash" kursi davlat geologiya ta'limi tizimida asosiy o'rinlardan birini egallab, talabalarning "Umumiy geologiya" fanidan olgan bilimlari asosida hamda birinchi dala o'quv amaliyotini o'taganlaridan keyin o'qitiladi. Mazkur kurs bo'yicha rus tilida chop etilgan A.Ye. Mixaylov, G.I.Sokratov va V.N.Pavlinovlarning darslik hamda o'quv qoʻllanmalari asosiy adabiyotlar bo'lib hisoblanadi. Lekin ularda rang-barang va boy geologik tuzilishga ega bo'lgan O'rta Osiyo hududining geologik strukturalari yetarlicha yoritilmagan. Shu bilan birga keyingi yillar davomida yangi geologik tadqiqot usullarining shakllanishi kurs mazmunini qisman o'zgartirib, ularni kengroq yoritishni taqozo etadi.