Маҳаллий вакиллик ва ижроия органларининг янгича ташкил қилиниши, ўз-ўзидан улар ўртасида янгича муносабатларни вужудга келишини тақозо этди. Ана шу муносабатлар, уларнинг ҳуқуқий асосларини таҳлилига муаллиф алоҳида эътибор қаратган. Ўзбекистон Президенти Олий Мажлиснинг сессиясидаги маърузасида, фуқароларнинг ўзини-ўзи бошқариш органларига катта умид қилинаётганлигини алоҳида таъкидлади. Рисолада эса фуқароларнинг ўзини-ўзи бошқариш органлари; уларнинг маҳаллий бошқарувдаги тутган ўрни, маҳаллий давлат органлари билан муносабатлари етарлича таҳлил қилинган. Маҳаллий давлат органларининг конституциявий вазифалари ҳали деярли ўрганилмаган масалалардан ҳисобланади. Муаллиф бу масалалар борасида ҳам тегишли иш қилган ва маҳаллий ҳокимият органларининг вазифаларини кўрсатиб бера олган. Рисоладаги муаллиф мулоҳазалари, фикрлари, тавсия ҳамда таклифлари, маҳаллий ҳокимият органлари тўғрисидаги қонунчиликни, маҳаллий давлат ҳокимияти органларининг тизими, фаолияти ва ваколатларини янада такомиллаштиришга ёрдам бериши мумкин.