Ushbu darslik shaxs va jamiyat munosabatlarini tizimli tarzda oʻrganuvchi psixologiyaning muhim tarmoqlaridan biri boʻlgan mutaxassislikka kirish faniga bagʻishlangan. Unda psixologik bilimlar turlari, psixologik bilimlar tarixi, psixologiyadagi dastlabki mashhur psixologlar, psixologiya metodlari, kasbiy kamolot tushunchasi, psixologiya kasb sifatida, psixolog faoliyatining koʻrinishi va sohalari, psixolog shaxsi, kasbiy shakllanishning bosqichlari va shart-sharoitlari, psixolog faoliyatini nazorat qiluvchi axloqiy me'yorlari va etik tamoyillar, mashhur psixologlarning hayoti va ijodiy yoʻli, Oʻzbekistonda psixologiya fanining qisqacha tarixiy taraqqiyoti bayon etilgan. Ushbu darslikda zamonaviy psixologiyada bugungi kun uchun dolzarb boʻlgan mavzular qamrab olingan. Bu mavzularni yoʻritishda xorij hamda rus psixologiyasi namoyandalarining, shuningdek Oʻzbekiston Respublikasi oliy ta'lim muassasalarida faoliyat olib borayotgan yetuk professor-oʻqituvchilarning darslik va oʻquv qoʻllanmalaridan foydalanilgan. Darslikdan oliy ta'lim muassasalarida tahsil olayotgan psixologiya, amaliy psixologiya ta'lim yoʻnalishi talabalari, shuningdek, shu sohada faoliyat yuritayotgan oʻqituvchilar, ilmiy xodimlar va psixologiya sohasiga qiziquvchi barcha kitobxonlar foydalanishi mumkin.