Маълумки, буюк рус адиби Николай Васильевич Гоголнинг сатира ва юморга бой реалистик асарлари мана икки асрдан буён дунёнинг барча мамлакатларида севиб ўқиб келинади. Унинг ижодида айниқса "Ревизор" комедияси яқкол ажралиб туради. Адиб мазкур асарида ўн тўққизинчи аср Русиясининг қолоқ бир шаҳарчаси ва унинг "ноёб" аҳолиси мисолида ўз замонасининг барча иллатларию нуқсонларини ўткир ҳажв тиғига олади. Ва энг муҳими ўқувчини мутолаа жараёнида сўнгги саҳифагача зериктириб қўймайди.