«Кўктўнликлар» Баҳодир Мурод Алининг биринчи йирик асари. Қиссанинг сюжети анъанавий кичик ҳикоялардан қурилган бўлишига қарамай, умумий яхлитлик касб этган. Муаллиф кийин мавзу - ўлкада Совет хукуматининг узил-кесил ўрнатилишини асарнинг бош мавзуси қилиб олган. Баҳодир бу мавзуга бутунлай янгича инсон руҳий оламини ёритиш йўлидан ёндошди. Ва буни баҳоли қудрат, айни замонда муваффақиятли бажарган. Сиз асарни ўқир экансиз, тирик, жонли одамларни кўргандек, улар билан қизғин сухбатлашгандек хис қиласиз ўзингизни. Агар иложи топилса, мулоқотнинг яна давом этишини жуда-жуда истайсиз. Тўпламга кирган ранг-баран ҳикоялар эса сиз азиз ўқувчиларга теран туйғулар ва ёқимли кайфият бахш этади.